نصيحتكم للي يدور راس البي قديم وش يفحص ووش يتأكد منه ؟

اشوف الي يفحصون يفكون غطاء الزيت يشوفون المكينه تبخر ولالا اما الباقي ماعندي خبره

اذا مالك خبره صعب تكشف فيها اي خلل فيها عمي شغال فيهن وعنده اكثر من 8 سيارات واشترى من المزاد رمضان الي راح وانغش بوحده فيها خلل بالدفرنسات وهو طول عمره شغال فيهن انا انصحك تبعد عن الحراج وتاخذ من المعارض الاسعار نازله وخاصة المستورد نازل كثير  

شف التبخير والصرفيه يلعبون فيه
يحطون لك ستوب مع الزيت ويثقل 
تقل الصرفيه والدخان والتبخير 
وهذي يكشفها لك الميكانيكي ان كان كويس

واحيان تصرف بدون ما تدخن


الخلاصه افحص عند ميكانيكي مو بالمعارض ويكون كويس
وحاول تشدها ٥٠ كيلو برا المدينه رايح جاي 
وان ما بينت الصرفيه به
خذه وتوكل على الله ان كان قيره ودفرنسه مضبوط


وشغل الحلال خفيف على الموتر مايتعبر شي
حتى السياره اللي تصرف تمشيك سنين


ولو اضطريت للتوظيب
حجم ٢٨ راسه الواحد يكفك ١٥٠٠ كامل مع شغله


الله يوقك بالسياره اللي تسرك يارب

السلام عليكم ورحمة الله ،،

أخي الكريم "كارينو"

بارك الله فيك، زي ما تفضلت أشوفهم يفكون الغطاء وبعضهم يحط يده وسوينا مثلهم تلقى فيه سحب هوا خفيف وبعضهم تلقى فيه مثل الزيت يوصخ يدك مدري له علاقه بالموضوع أو لا وفعلاً شفت لي راس يبخر تبخير قوي واضح مافيه مجال للشك لكن مهوب كلهن نفس التبخير حسب اللي أشوفه ..


اخوي "هارت90"
لا والله مافيه خبرة لا طويلة ولا قصيرة لكن فيه حب للتعلم وقدرة على الإستيعاب ولله الحمد وماعندي مانع من التجربة وأخذ الدروس في الحياة وإن حصل نصائح من المجربين أمثالكم فبالتأكيد انها مفيدة وتقطع علي طريق واجد وتقربني من المنشود بشكل أفضل والله يجزاك خير، المعارض فيهم طمع وقليل تجد مطلوبك وبتدفع فرق أكثر من 10000 ريال وعساك تسلم منهم ..

.
.

أخي الكريم "الملك المجهول"

الله يجزاك خير ويزيدك من علمه النافع وينفعك فيه ..
أنا لو لقيت راعي راس مناسب أصلح انا واياه زين وأكيد بأفحص وأجرب بس المشكلة في أهل المعارض مع الأسف قليل تجد فيهم الناصح الأمين وان لقيت بتلقى الموتر عندهم غالي جداً مقارنة بالسوق ولا يمدحه ولا يذمه يقولك افحص وان طلع فيه عيب خسرت قيمة الفحص وهو ما خسر شي، والمزاد يمر عليك فيه سيارات كثير وقليل تجد لك صيده لكن فيه للي بيصبر ويستمر يحضر ..

ومثل ما تفضلت اخوي شغل الحلال خفيف ولكني أبي موتر لي وللزمن يعني موتر نظيف ما أتحسف عليه بكره ولو بغيت أبيع ما نشب بحلقي ولا فيه أحجام رخيصه بس مالها رغبة ..

وجزاك الله خير على معلومة التوظيب فعلاً هذي فائدة كبيرة خذتها منك الله يجعلها في موازين حسناتك وتخلي الواحد يحسب حساب لأن المسألة مهيب سهله إذا التأمين بس حول 3 الآف من غير نقل وغيره يعني مهيب مثل السيارات العادية ..


والله يجزاكم خير ما زلت بحاجة لبعض النصائح مثل القير وشلون أدري انه سليم ؟!

والكهرباء هل هي متعبه شغلتها لأن بعض الروس أشوف الأسلاك فيها حدث ولا حرج !!

وهل التنجيدوتجديد الغمارة من داخل يكلف واجد ؟ لأني ألقى أحيان روس مكينتها ما شاء الله صوتها صافي وقيرها متماسك بس الداخليه دمار ؟!

وكفرات الراس جنط 24 كم تكلف لو كانت محتاجه تغيير ؟!


الواحد ما وده يسوم إلا وهو يدري كم بياكل الموتر عشان يستخدمه ..


والله يجزاكم خير جميع .

السلام عليكم ورحمة الله وبركاته ،،


أبشركم شريت موتر والله يجزاكم خير على ردودكم ونصايحكم كلها أخذتها بالحسبان وحاولت أوفق بينهن وبين المعروض والحمد لله رب العالمين على التوفيق والتسهيل والله يبارك لنا فيه ويجزاكم خير .

والسلام عليكم ورحمة الله .

السلام عليكم
حصلت البي ٢٦٣٨ قير كهربه وانا مادري ويش عيوب القير الكهربه
ولا ادري الطرنبه تجي كهربه ول عايدي
الي عندها معلومه يفيدنا الله يعطيكم العافيه