مناقشة مشروع المعدات الثقيلة والنقليات نحتاج أهل الخبرة

المشروع مربح جدا خصوصا القلابات والشيول تأجر بعضها بمبالغ توصل ل 30الف ريال شهريا .
طبعا الموضوع فيه مخاطرة لأن اسعار المعدات غالية و لازم تضمن لك مستأجر قبل تقرر تشتري المعدة عشان لا توقف جنب بيتك

عليه التفكير مليا بخارطه الطريق الموضحه ادناه عسى الله يكتب له الفائده..
1-العمل يتطلب ان يكون هناك شخص متفرغ لمتابعه
هذا العمل وهو في الحقيقه يتطلب جهدا كبير وتفرغ كامل من الساعه السادسه صباحا الي مثلها مساء
ويكون لديه سياره ونيت وعده ومستعد لاي طاري
من حوادث المرور الي البنشر وكذلك التفاهم مع الزبائن والبحث عن عمل جديد وتوجيه السيارات ومتابعه السائقين.....وسلم على الثوب والعقال ومستوى النظافه
2-الحد الادنى للربحيه عدد2 قلابي سكس للمغامر المبتدىء...ويفضل في البدايه ان تستاجر هذه السيارات
في اليوميه لتامين طريق الانسحاب وتقليص الخسائر وعدم التورط في خساره كبيره..فان عجبك الامر استمر
واذا لم يعجبك الامر طريق الانسحاب مفتوح وبحد ادنى من الخسائر
3- اثناء هذه الفتره اذا استمريت ستتمكن من التعرف على اسلوب العمل ومواقع الزبائن وكيفيه ايجادمصادر عمل وفرص جديده مع الاخذ بالاستمراريه وعدم التوسع بسرعه بالثبات والالتزام بالمصداقيه والوفاء مع الزبائن
وهذا الامر يتطلب جهدا ووقتا ليس باليسير..وحاول دائما ان لاتنهزم من اول مجابهه مع الصعوبات ففي اي مشروع الامر يتطلب وقتا للنجاح
4- في ماعملته الي حد الان ستتعرف تدريجيا على السوق واوضاع واوضاع العمل والعمال والضروف المحيطه فان راق لك الامر استمر..وماعليك الا اضافه المعده المطلوبه عند الحاجه وبالايجار....
5- اذا تأكدت من نجاحك بالمشروع ابدا باضافه شيول وبكلين بالايجار وحاول الحصول على مشاريع صغيره سواء احفر اودفان لمقاطع صغيره ومتوسطه من الحفريات والدفان داخل المدن واذا تاكدت من نجاحك في هذا المجال ستصل للخطوه الاخيره وهي
6- في هذه اللحظه اذا ثبت قدميك في السوق بامكانك ان تشتري السيارات بالتقسيط وان لاتدفع شيئا مماجمعته سابقا بل اتركه احتياطا في اوقات هبوط الاعمال وتسدد كل سياره من عملها وعدد السيارات بحجم العمل الذي تقدره من واقع خبرتك واعتقد انك في هذه اللحظه ستفكر الانتقال الي حفريات وردميات الطرق 
الطويله ويكون لديك سائقين وموظفين ومساحين ومهندسين لمتابعه عمليات الحفر والردم وستكون في وقتها مقاولا مرموقا هنا ستعد عشرات الملايين بيديك
7- بالنسبه لانواع السيارات هذا امر ثانوي فما عليك الا النظرالي كتلوجاتها وامكانياتها وافضلها المرسيدس
والصناعه الالمانيه بشكل عام..وستتعرف عليها تدريجيا بمرور الوقت...
لاتخاف المغامره اساس النجاح..الصبر والتعب والمثابره ستوصلك الي الخطوه الاخيره السوق مفتوح وبه منافسه ...ولكن اجعل نفسك مميزا بدقه العمل والوفاء بالتزامتك..امام الزبائن حتى وان كان هناك خساره لك..ستجد النجاح هو حب عملائك لك ومعرفتهم انك ستفي بالعمل مهما كلف الامر ستجدهم يبحثون عنك
وستنهال عليك الفرص من كل مكان
وكل عام وانتم بخير ومن العائدين




هنا خلاصة الكلام لاتبدا بشي ماتعرف عنه شي مثلها مثل الأسهم
مثل مافيه محترفين في الأسهم يوجد محترفين في المجالات الأخرى
بعدين اغلب المنافسين تجار واصحاب سمو ملكي
والله يوفقك .

بيض الله وجهك يالغالي.. خطوات مهمة وواقعية.. أشكرك على إثرائك

ننتظر المزيد

والله الدكتور فيه دراهم وايجاره يصل لحد 60 ألف ريال بس 
فيها تعب وبالنسبه للدركتر قبل لا تشريه لازم يكون عندك سواق 
فاهم ولو يكون مكانيكي يكون أفضل لأن عطلاته كثيره ولازم 
يكون معك رأس مال أقل شي 200 ألف عشان لاخرب ماتتوقف. 

 خذ العلم من شخص يمارس عمل المعدات حاليا اللي هو شخصي المتواضع
1/ لابد ان تكون انت نفسك تعرف تسوق المعده مثل الشيول والقلاب
2/لابد تعرف تشحم وعمل الصيانه الخفيفه وبعض الاصلاحات
3/ المتابعه اليوميه
4/ انت عامل احتياط يتم استدعائك في اي لحظه تركب الشيول او القلاب او الاثنين معا!!
5/ قصة 30 الف غير واقعيه على شيول وقلاب لاانه المتوسط 500 ريال يوميا
6/المعدات لابد تكون من اساسها نظيفه او اهلا بك في عالم الاعطال؟؟
7/ تاجير على شركات معنها معدتك سكراب خلال وقت قصير
8/ هناك قائمة بيضاء وسوداء للزبائن
9/لابد الاتفاق على سعر اي عمل مع الزبون او تدخل في مشاكل!!
10/ هل انت مستعد للتعب والمتعه معا؟؟

شغل يعتمد علي العلاقات والسواق
الي دخلو الشغلة جديد وما يعرفون شي ما اعتقد يحققون ارباح

انا شغال في المقاولات  ، اكثر ما يتعبنا هم العمال مره يبون شقه ويبون فلوس الاكل ويتشرطون كثير لكن هذا حقهم والله يعيننا ، طبعا اهم المعدات هي معدات الحفر وبعدها يجي معدات النقل مثل القلاب التراب وبعدها الشيول وبعدها المعدات الصغيره مثل الشيولات الصغيره الي تدور بالمشروع تنقل وتشيل واهم شيء العلاقات تكون تعرف شركات تبي معدات او تبحث عنهم وتقدم خدماتك وبالتوفيق ان شاء الله

بالمختصر  هي :
ورشة صيانة تعب مشاوير مشاكل عمال 
علاقات جيده ومعارف /سواق جيد / خبره
30 الف ؟؟؟ ناوي يبيعك معده عنده 
ارزاق وتوفيق من الله 

الله يجزاكم خير وشكرآللجميع